Katja Gauriloff bagadallan Sálbma-musihkkavideo vuosttášeahkedis Skábmagovain

Katja Gauriloff giehtačállán ja bagadallan musihkkavideo Ánnámáret Ensemble Sálbma-lávlagii, oažžu máilmmi vuosttášeahkeda eamiálbmogiid filbmafestiválas Skábmagovain Anáris. Musihkkavideo ovdanbuktá govaiguin Sálbma-lávlaga teavstta temá, guhte muitala Sámi álbmoga oktiigullevašvuođas ja dás, movt Sámi álbmot sáhttá bargat ovttas vai sin kultuvrra seailu nanusin boahttevaš buolvvaide. Lávlaga teavstta ja šuoŋa lea ráhkadan Ánnámáret Ensemble solista Anna Näkkäläjärvi-Länsman.

Musihkkavideos lea mielde stuorra eaktodáhtolaš neavttáriid joavku, guhte lei mielde govvenbeaivvis Njuorggámis, Stuorrageađgeváris borgemánus. Eaktodáhtolaččat ledje vuolgán mielde Njuorggámis ja Ohcejogas muhto maiddái gitta Vuohčus, Čeavetjávrris, Anáris ja rájá nubbi bealde Deanus. Beaivi ii lean bargojovkui iige eaktodáhtolaččaide álki, go govvenbáikkis duoddaris arvvii ja biekkai garrasit oba govvenbeaivvi. Katja ja Anna goittotge illudeaba, go govvenbeaivi lihkostuvai das fuolatkeahttá bures ja dál beassát čájehit bohtosiid.

Bagadalli Katja Gauriloffii prošeavttas earenoamáš dehálaš lea, go musihkkavideo lea stuorámus osiin ráhkaduvvon davi guovllu olbmuiguin ja mediasuorggi čehpiiguin. –Lean hui movttet, go bessen bargat Sálbma-musihkkavideo buvttadeamis davi olbmuiguin. Illudan maiddái go nie stuorra eaktodáhtolaččaid joavku sierra guovlluin Sámis vulggii mielde ollášuhttit video. Ja go jurddaša govvenjoavkku, lea somá go mediasuorggi ámmátlaččat gávdnojit davvin maid, Katja Gauriloff muitala.

Sálbma-musihkkavideo leat leamašan mielde ollášuhttime Kevin Francett – govven, Aleksi Ahlakorpi – veahkkebagadalli, Jonne Järvinen – govvenassisteantta ja Niki Rasmus – ivdnemeroštallan. Musihkkavideo lea editeren Timo Peltola, guhte lea maiddái Katja Gauriloffa Mánu meahci Kaisa –dokumentára čuohppi. Sálbma-musihkkavideo leat dorjon Sámi oahpahusguovddáš, Dáidaga ovddidanguovddáš, Majaoja-vuođđudus ja Sámi Siida rs.

Máilmmi vuosttášeahket Skábmagovain lávvordaga 27.1.2018 dmu 12 sámekulturguovddáš Sajosa auditorias Anáris oassin Sápmi3: Davi muitalusat -ealligovvačájáhusa.

Sálbma-musihkkavideo čájehuvvo guovvamánu áigge maiddái Ohcejoga ealligovvateáhtera Davvenástti ealligovvačájáhusaid álggus.

Ánnámáret lea mielde Skábmagovaid áigge musihkkadáhpáhusas Anára Hotealla Kultahovis ovttas jouhikkočuojaheddjiin Ilkka Heinoneniin. Duo prográmmas leat Ánnámáreha lávlagat ja muhttin árbevirolaš luođit heivehuvvon oktii jouhikko-čuojanasain. Seammá dáhpáhusas leat mielde maiddái Amoc ja Ailu Valle. Dáhpáhus lea bearjadaga 26.1.2018 dmu 22 Hotealla Kultahovis ja dan ordne Tuupa Records Oy.

Lassedieđut:

Anna Näkkäläjärvi-Länsman

anna@annamaret.fi

www.annamaret.fi

tel. +358 40 540 5985

 

www.skabmagovat.fi

 

Govvamateriála dás.