Sálbma-musihkkavideo čájehuvvo guovvamánus Ohcejoga ealligovvateáhteris

Katja Gauriloff giehtačállán ja bagadallan musihkkavideo Ánnámáret Ensemble Sálbma-lávlagii, oaččui máilmmi vuosttášeahkeda eamiálbmogiid filbmafestiválas Skábmagovain Anáris ođđajagimánu loahpas. Musihkkavideo ovdanbuktá govaiguin Sálbma-lávlaga teavstta temá, guhte muitala Sámi álbmoga oktiigullevašvuođas ja dás, movt Sámi álbmot sáhttá bargat ovttas vai sin kultuvrra seailu nanusin boahttevaš buolvvaide. Lávlaga teavstta ja šuoŋa lea ráhkadan Ánnámáret Ensemble solista Anna Näkkäläjärvi-Länsman.

Musihkkavideos lea mielde stuorra eaktodáhtolaš neavttáriid joavku, guhte lei mielde govvenbeaivvis Njuorggámis, Stuorrageađgeváris borgemánus. Eaktodáhtolaččat ledje vuolgán mielde Njuorggámis ja Ohcejogas muhto maiddái gitta Vuohčus, Čeavetjávrris, Anáris ja rájá nubbi bealde Deanus. Beaivi ii lean bargojovkui iige eaktodáhtolaččaide álki, go govvenbáikkis duoddaris arvvii ja biekkai garrasit oba govvenbeaivvi. Katja ja Anna goittotge illudeaba, go govvenbeaivi lihkostuvai das fuolatkeahttá bures.

Ánná ruovttugilis Ohcejogas leat čavčča rájes illudan, go gillái leat fas ožžon ealligovvateáhtera, mii čájeha ođđaseamos ealligovaid. Teáhtera namma lea Davvenásti ja dat lea Áilegas-guovddáža oktavuođas. Maiddái Sálbma-musihkkavideo lea Davvenástti prográmmas go dat čájehuvvo ealligovvačájáhusaid oktavuođas oba guovvamánu áigge. Vuosttáš čájáhus lea duorastaga 9.2. dmu 19 čájáhusa álggus.

Ohcejoga ealligovvateáhteris beassá maiddái boahttevuođas gullat Ánnámárehá musihka. Ealligovvateáhter Davvenástti rahpandoalut lea guovvamánu loahpas ja dalle almmustuvvá maiddái teáhtera váras ráhkaduvvon trailer, masa Ánnámáret lea komponeren ođđa musihka.

Lassedieđut:

Anna Näkkäläjärvi-Länsman

anna@annamaret.fi

Tel. +358405405985

www.annamaret.fi

www.ailegas.fi