Sámi allaskuvllas lea juoigan- ja luohtefáttás ságastallankafea mas journalistihka oahpaheaddji Liv Inger Somby lea prográmmajođiheaddji.

Lágideamis lea vejolaš gullat ja oaidnit miellagiddevaš fágabargguid ja dutkama bohtosiid áššiin nu go makkár mearkkašupmi lea juoigamis olbmo dearvvašvuhtii ja identitehtii, giela ja kultuvrra seailluheamis.

• Journalistastudeanta Máret Inger Anti lea ráhkadan dokumentárafilmmaid juoigama birra. Máret Inger searvá kafeaságastallamii muitalit iežas studeantabargguid birra.
• Sámi buohccidivššároahpu prošeaktajođiheaddji Anja Somby ságastallá mo juoigan ja luohti luvve sielu ja rupmaša.
• Allaskuvllalektor Mai Britt Utsi lea dutkame Várjjat luđiid javzzaid ja son sihke ovdanbuktá daid ja muitala mo javzen doarju muittu.
• Allaskuvllalektor Annukka Hirvasvuopio-Laiti lea dutkame makkár mearkkašupmi lea luođis Deatnogátte nuoraid musihkas.
• Allaskuvllalektor Ánte Mihkkal Gaup ságastallá luohtebidjama birra – boahtá go luohti biekka mielde?
• Sámi Musihkkaakademiija Anna Näkkäläjärvi-Länsman lea dutkan mo luohti hukse sámi identitehta.
• Sámi Arkiivva jođiheaddji Inga Márjá Steinfjell bidjá fuomášumi mo ja manne álgoálbmogiid njálmmálaš dieđuid nu go luđiid ja dajahusaid galggašii vurket.
• Sámi allaskuvlla rektor Laila Susanne Vars sáhkavuorru lea máid sáhttá Sámi allaskuvla bargat vai luođi ja juoigama seailluhit boahtteáigái.

Lágideapmi lea nuvttá ja rabas buohkaide. 

Báiki: Guovdageaidnu, Alfreds Kro
Ahkkemearri: 18 jagi
Uvssat rahppasit dii. 18.00. 

FUOMÁŠ! Korona-dilálašvuođa geažil sáhttá lágideapmi rievdaduvvot. Eambbo dieđut bohtet.

Dutkanbeaivvit: www.forskningsdagene.no
Sámi allaskuvla: www.samas.no