Jávrrešduoddara luođit konsearttas Márjjábeivviin
Ánnámáret lea ovttas Heahtá Márjjábeivviin lágidan konseartta, man temán leat Jávrrešduoddara luođit. Konsearttas leat mielde máŋggat juoigit ja sii rohttejit ovttas ja okto luđiid mat gullet sin máttuide.
–Dán áiggis luđiid gullá rádios ja konsearttain. Smihtten ahte Jávrrešduoddara luohteárbevieru sáhtálii čalmmustahttit konsearttas go lea jo nu earenoamáš ja fiinnis. Lean dutkán arkiivvaid ja doppe lea čielgasit gullomis makkár Jávrrešduoddara luohteárbevierru lea historjjálaččat leamašan. Somá gal dál iskat buktit dáid boares luđiid dán áigái. Dieđusge dološ áiggi mii eat oaččo ruovttoluodda, muhto mii sáhttit muittašit máttuid ja sin eallima luđiid bakte, sámemusihkkár Anna Näkkäläjärvi-Länsman muitala.
Konseartta leat leamašan mielde pláneme maiddái dovddus sámi dáiddárat Petra Biret Magga-Vars ja Ingá-Máret Gaup Juuso. Lávdái lávkejit maiddái Ole Heandarat Magga, Anna-Reetta Niemelä ja Oarjánnieiddat. Juigiid ovttastahttet máttut Jávrrešduoddaris. Konsearttas leat mielde maiddái čuojaheaddjit ja oassi luđiin leat heivehuvvon oktii čuojanasaiguin. Janne Lappalainen čuojaha konsearttas giellačuojanasaid ja perkušuvnnaid ja Sara Puljula kontrabássa ja perkušuvnnaid.
Máttut – Jávrrešduoddara luođit -konsearta lágiduvvo lávvordaga 23.3.2019 dmu 18 Vuollikkas, Heahtás. Bileahtat 20 euro, bileahtavuovdin álgá diimmu ovdal konseartta. Máksin dušše ruđain.
Konseartta leat ruhtadan Sámiráđđi ja Dáidaga ovddidanguovddáš.
Lassedieđut:
Anna Näkkäläjärvi-Länsman
anna@annamaret.fi
tel. +358405405985
