Ánnámáreha konsearta doalvu nieguid duovdagiidda Skábmagovain
Nieguid duovdagat lea Ánnámáreha, dahjege Ohcejogas doaibmi sámemusihkkár Anna Näkkäläjärvi-Länsmana ođđa musihkkii huksejuvvon ollisvuohta. Dat doalvu guldaleddjiid govahallon duoddariidda. Konsearta ollašuhttojuvvo ođđajagimánu maŋimuš vahkoloahpas eamiálbmogiid filbmafestivála Skábmagovain, Anáris,
Ánnámáret ja su bargojoavku leat beroštuvvan dutkat dan, go dán áigge lea máŋgii hui dehalaš ohcalit ruohttasiid.
“Lea gelddolaš bovdet olbmuid min konsertii go jietnamáilmmi, man mii leat ovttas musihkkáriiguin huksen, buktá mu musihka ovdán aivve ođđa hámis. Maiddái konseartta temá lea munnje dehálaš. Dat ovdanbuktá jurdagiiddán modeardna ja árbevirolaš kultuvrra deaivvadeamis. Earenoamážit munnje miellagiddevaš lea, ahte manin mis lea dárbu dutkat historjjá ja ruohttasiid. Manin dat lea midjiide dehálaš? Leago dat persovnnalaš dárbu, identitehta huksen vai politihkalaš dahku?”, Anna Näkkäläjärvi-Länsman suokkardallá.
Nieguid duovdagat -konseartta jietnamáilmmis ovttastuvvet dološ áigi ja dalá áigi. Mielde leat sihke árbevirolaš ja modeardna elemeanttat: Ánnámáreha vokálat sihke árbevirolaš suopmelaš álbmotčuojanas jouhikko, man čuojaha Ilkka Heinonen ja japánalaš shakuhachi-njurggonasa, man čuojaha Turkka Inkilä. Árbevirolaš elemeanttat leat ovttastahttojuvvon elektrovnnalaš musihkkii. Musihka lassin leat mielde vel visuála elemeanttat nappo anárlaš Marja Viitahuhta videoduojit. Ovttas buot dat ságastallet oktasaš globála áiggis ja speadjalastet historjjái ja ruohttasiidda.
Konsearta: Nieguid duovdagat – Imaginary Landscapes.
Báiki ja áigi: Lávvordaga 26.1.2019 dmu 20 Sajos, Anár.
Bileahtat: 20 €, bileahtaid sáhttá oastit ovddalgihtii čujuhusas www.skabmagovat.fi ja diimmu ovdal konseartta uvssas.
Facebook-dáhpahus: www.facebook.com/events/545568245953729/
Lassedieđut: Anna Näkkäläjärvi-Länsman, Tel. +358 40 540 5985, anna@annamaret.fi, www.annamaret.fi
Skábmagovat: Festiválabuvttadeaddji Taru Arrela, Tel. +358 40191162, taru.arrela@skabmagovat.fi, www.skabmagovat.fi
