Čuovgga urbbis čuodjá Ima ja Ánnámáreha ođđa doaivva
“Čuovgga urbi” lea áibbas ođđa juovlalávlla, mii almmustuvvá Čábbámus juovlalávlagat -gihppagis. Lávlla lea guovtti sámi dáiddára ovttasbargu.Inger-Mari Aikio, Ima, čálii lávlagii teavstta ja Anna Näkkäläjärvi-Länsman, Ánnámáret, fas bijai su diktii šuoŋa.
Anna Näkkäläjärvi-Länsman ja Inger-Mari Aikio Buolbmatjávrre gáttis skábmamánus 2022
“Dálvejorggáldat ja juovllat leat hui lahkalagaid. Ođđa lávki čuovgga ja buoret áiggi guvlui ligge olbmuid váimmuid. Sávan ahte munno Ánnámárehiin lávlla šaddá sápmelaččaide oahpisin ja lávllan, man olbmot duođas háliidit lávlut. Sávan ahte čuovgga urbi leahkkasa ja deavdá olbmuid mielaid erenoamážit skábman. Lean hui čeavlái ja ilus das, go munno lávlla lea fárus ođđa juovlalávllagihppagis. Doaivvu miel das šaddá oahpis ja ráhkis midjiide sápmelaččaide. Mu mielas lávlagis lea olu doaivva, man mii buohkat dárbbašat dál sevdnjes áigge.” Nu muitala lávlaga sániid čállán Inger-Mari Aikio Čuovgga urbi -juovlalávlagis.
“Ima juovlalávllateavsttas lea olu doaivva ja illu. Teaksta lea čáppat ja das lea čiekŋalis sisdoallu. Isken duddjot šukŋii heivvolaš vuogas dovddu. Orru hui dehálaš dahkat ođđa davvisámegielat lávlaga ovttaslávluma várás. Lea gelddolaš oaidnit, mo sámegielat lávlut váldet dan vuostá. Doaivvu mielde sáhttit almmustahttit lávlaga stream-bálvalusain, vai dan livččii álki guldalit ja lávlut maid fárus.” Nu sávvá šuoŋa dahkki Ánnámáret.
Sámegielat Čábbámus juovlalávlagat -dilálašvuođat johtigohtet Suoma gávpogiin boahtte vahkus. Sotnabeaivve 4.12. Ánnámáret lea fárus Helssega duopmogirkus lávlumin vuosttas geardde Čuovgga urbi -lávlaga. Lávlla lávlojuvvo maid ovttas. Dilálašvuhtii sáhttá oassálastit gáiddusin Helssega duopmogirkosearvegotti YouTube -kanála bokte.
Čuovgga urbi
(Teaksta Inger-Mari Aikio 2022)
Go čuovgga urbi luotkana
Seavdnjada fápmu boatkana
Skápma gietkama searrobáttit
Dálvejorggáldahkan ložžet
Sielu mánná juovllaid láhčá
Fállá čuovgga buohkaide
Go čuovgga urbi luotkana
Doaivvuhisvuohta boatkana
Juovlalávlagat váimmuid rahpet
Čuovgga urbbis fámu gávdnet
Sielu mánná juovllaid láhčá
Fállá čuovgga buohkaide
Go čuovgga urbi luotkana
Iluhisvuohta boatkana
Gietkka vuhtoda ođđa duoji
Skábmaáiggi láđis moji
Sielu mánná juovllaid láhčá
Fállá čuovgga buohkaide
Lisätietoja:
Anna Näkkäläjärvi-Länsman
anna@annamaret.fi
Puh. 040 540 5985