Ailu Valle guossin Ánnámáreha Johtit ain -lávlagis
Ailu Valle ja Ánnámáreha ođđa musihkalaš ovttasbargu almmustuvvo bearjadaga 13.8. Rap-artista Ailu Valle guossástallá sámemusihkkár Ánnámáreha lávlagis Johtit ain. Lávlla lea almmustuvvan vuosttas háve Nieguid duovdagat albumas 6.2.2021. Ođđa veršuvnnas Ailu Valle ráppe sámegillii iežas teavstta. - Ánnámáreha luohti ja Turkka komposišuvdna dolvo mu čáledettiin niehkomáilbmái, gos jođán áiggiheamet Sámi duovdagiin, muitala Ailu Valle čállinproseassa birra.
Ailu Valle ja Ánnámáret. Photo credits Marja Viitahuhta.
- Johtit ain -lávlaga stiila lea diekkár, ahte dat meastá jo gáibida rap mielde. Mii illudit ovttas oba Nieguid duovdagat joavkkuin, go Ailu Valle álggii ovttasbargui minguin. Lea stuorra gudni bargat Ailluin, guhte lea čeahpes musihkkár ja giellameašttir, Ánnámáret fas muitala dal almmustuvvi lávlaga duogážis. Johtit ain featuring Ailu Valle -lávlla gávdno stream-bálvalusain ja Ánnámáreha youtube-kanálas 13.8.2021 rájes.
Johtit ain lea almmustuvvan vuosttas hámis Ánnámáreha Nieguid duovdagat albumas, guhte almmustuvai 6.2.2021. Albuma musihka leat ovttas ráhkadan Ánnámáret (luođit), Ilkka Heinonen (jouhikko) ja Turkka Inkilä (elektronihkka ja shakuhachi). Turkka Inkilä lea maiddái buvttadan dál almmustuvvi singela ja Nieguid duovdagat -albuma. Albuma lea leamašan árvvoštallanmenestupmi ja dan almmustahtii ja Johtit ain featuring Ailu Valle -lávlaga almmustahttá UKSI Productions.
JOHTIT AIN FEAT AILU VALLE sánit
Ailu:
dat lea čuovga mii,
jođiha min dáid duovdagiin
go mii johtit, johtit
sáhttit gal orustit suoivanii
dat leat beare mohkit, mohkit,
de mii fas čuoigalit
eallin ii bisán, nu dán bálgá
mii joatkit mii ii noga iige álgán
sielut báidnemeahttumat
duolmmastagat
oaidnemeahttumat
daid mii guoradit, máttuid luottaid
iđii albmeravda, iđii duottar
iđii orohat duoddara duohkin
gos dološ goahti viisodaga juohkimin
seammás nu ođas, seammás nu oahpis
bealljemáddagis gullosta luohti
Ánnámáret:
Váldde mu oappáidanguin
doalvvo ođđa máilbmái
Luobahit iežamet
dál fas du háldui
Badjel váriid duoddariid
girddašit goaskimin
Dáid duovdagiid mielde
johtit ain viidáseappot
Ohcat čáppa guohtumiid
eatnama skeaŋkkaid
Dál oaffaruššat
luonddu ipmiliid fámuide
Ailu:
guovža jorihii biejus, masá morihii niegus
muh geahku gozihit čiegus dieđu
biđii seailluhit leabu
man árpmus deattán jávkkihii
stuorra stállu báktin bávkkihii
lávkkit gehppo nu ah sáhtii girdilit
gieđaid sajis soaját suodjái sirdilit
deaivvadit hieimmain áimmus ráfis
fámut eatnamis, dolas ja čázis
skeaŋkan ipmiliin badjin ja vuolde
maid guoddit niegu rájá badjel mielde
veadjemeahttunge vejolaš
guovllus guvlui belolaš
johtit ain dego silolaš elolaš
váimmustis ruoktosis jegolaš